ပဝါရဏာ၏ အဓိပ္ပာယ်က 'ဖိတ်မန်ခြင်း' ဟု အဓိပ္ပာယ်ရသည်။ ကျောင်းတိုက်တခု၌ ဝါကပ်သော သံဃာ သို့မဟုတ် ပဝါရဏာဂိုဏ်း ဖွဲ့ထားသော နီးစပ်ရာ ကျောင်းတိုက်မှ သံဃာ တို့သည် သိမ်တခုမှာ အညီအညွတ် စုရုံးပြီး မထေရ်ကြီးမှ အစ အငယ်ဆုံး ရဟန်းထိ တပါးချင်းစီ ပဝါရဏာ ပါဠိ ရွတ်ဆိုကာ ပဝါရဏာ ပြုကြရသည်။ သံဃာ အားလုံး ယုံကြည်မှု ခိုင်မြဲရေး၊ ချစ်ကြည်ရေး၊ စည်းလုံး ညီညွတ်ရေး အတွက် အဖဘုရား ချမှတ်ထားခဲ့သော အလွန်ကောင်းမြတ်သည့် အစဉ်အလာ ဖြစ်သည်။
"သံဃာတော် အရှင်သူမြတ်တို့ ဘုရား … တပည့်တော်မှာ အပြစ် တစုံတရာ ရှိကြောင်း ကိုယ်တိုင်မြင်၍ ဖြစ်စေ၊ တစ်ဆင့်ကြား၍ ဖြစ်စေ၊ ယုံမှား သံသယရှိ၍ ဖြစ်စေ၊ ထောက် ပြပြောဆိုဖို့ ဖိတ်မန်ပါသည် ဘုရား။ အရှင်မြတ်တို့က တပည့်တော်ကို သနားသော အားဖြင့် ပြောဆို ဆုံးမကြပါဘုရား။ တပည့်တော် အပြစ်ရှိရိုး မှန်လျှင် ကုစားပါမည်။ ပြုပြင်ပါမည် ဘုရား …" ဒါက ပဝါရဏာပြုပုံ ဖြစ်၏။
လူပုဂ္ဂိုလ် တဦးနှင့် တဦး ကြားမှာဖြစ်စေ၊ အဖွဲ့အစည်း အတွင်း အချင်းချင်း ကြားမှာဖြစ်စေ တဦးအပေါ် တဦး သံသယ ကင်းရှင်းပြီး ယုံကြည်မှု ရှိဖို့ လိုသည်။ ယုံကြည်မှုနှင့် ဆက်ဆံ ပေါင်းသင်း ကြရသည်။ အလုပ်လုပ်ကိုင် ကြရသည်။ ယုံကြည်မှု တည်ဆောက်နိုင်ဖို့ အတွက် ရိုးသားဖို့ လိုသည်။ ရိုးသားသည်ဟု လက်ခံနိုင်ဖို့ အတွက် လျှို့ဝှက်ထားခြင်း၊ ထိန်ချန်ထားခြင်း မရှိ၊ ပွင့်လင်းဖို့ လိုသည်။ ပဝါရဏာ ဟူသည် ပွင့်လင်းမှု၏ တန်ဖိုးကို ဖော်ညွှန်းသော ပြယုဂ် တခု ဖြစ်သည်။ အပြစ်ဟူသည် လူတိုင်းမှာ ရှိသည်။ လောဘ၊ ဒေါသ မကင်းနိုင်သေးသူ မှန်သမျှ အပြစ်မကင်း နိုင်သေးပါ။ လောဘ၊ ဒေါသကင်းမှသာ အပြစ်ကင်းပါ၏။ လောဘ၊ ဒေါသအားကြီးသူက အပြစ် ပိုများ၍ လောဘ၊ ဒေါသ နည်းသူက အပြစ်နည်းမည်။ အတ္တသည် လောဘ၏ ကိုယ်ပွားဖြစ်သဖြင့် အတ္တကြီးသူက အပြစ်ပိုကြီး၍ အတ္တနည်းသူက အပြစ်နည်းမည်။ ကိုယ့်အပြစ်ကိုယ် မြင်ဖို့ သိဖို့ လိုသည်။ ကိုယ့်အပြစ် ကိုယ်သိမြင်ပြီးလျှင် ဝန်ခံဖို့လို သည်။ ပြုပြင်ဖို့ လိုသည်။ ပြုပြင်ဟု ဆိုသည့် အတိုင်း ပြုဖို့ လိုသလို ပြင်ဖို့လည်း လိုသည်။
သင်္ခါရဟူသည် ပြုပြင်မှုကို အမြဲတစေ တောင်းဆိုနေသည်။ ပြုလည်းပြု၊ ပြင်လည်းပြင်မှ ဖြစ်မည်။ ပြုလည်းပြု၊ ပြင်လည်း ပြင်မှသာ အကောင်းဘက်သို့ ပြောင်းလဲမည်။ မပြုလည်း မပြု၊ မပြင်လည်း မပြင်လျှင် အဆိုးဘက်သို့သာ ပြောင်းလဲ သွားလိမ့်မည်။ ပြုပြင် ပြောင်းလဲဟူရာ၌ အကောင်းဘက်သို့ ပြောင်းလဲဖို့ အတွက် ပြုပေး ပြင်ပေးမှ ဖြစ်မည်။ ပြုဟူရာ၌ ဖြစ်အောင် ပြုတတ်မှ ပြုရာ ရောက်သည်။ ဖြစ်အောင် မပြုတတ်လျှင် ဖျက်တာနှင့် အတူတူပင် ဖြစ်သည်။ ကျွမ်းကျင်မှ လိမ္မာ ဆိုသည့်အတိုင်း မိမိ ကျွမ်းကျင်သည့် အလုပ်ကို လုပ်မှ လူလိမ္မာ ဖြစ်မည်။ မိမိ မကျွမ်းကျင်သော အလုပ်ကို လုပ်လျှင် လူမိုက် ဖြစ်တတ်သည်။ မိမိက ပြုသော်လည်း မပြုတတ်လျှင် ပြုပုံ ပြုနည်း မမှန်လျှင် ပြုရာ မရောက်ဘဲ ဖျက်ရာ ရောက်တတ်သည်။ ထိုအခါ မိမိ ပြုနေတာကို ပြင်ဖို့ လိုသည်။ ပြင်ကို ပြင်မှ ဖြစ်မည်။
ကိုယ့်အမှားကို ပြုပြင်ရဲသော သတ္ဈိသည်သာ သတ္တိ အစစ် ဖြစ်သည်။ လူအများစုက ကိုယ့်ကိုယ်ကိုယ် အပြစ်ကင်းသူဟု ထင်ကြသည်။ အပြစ်ရှိမှန်း သိသော်လည်း ကိုယ့်ကိုယ်ကိုယ် ဖော့တွေးတွေးပြီး အပြစ်ကင်းသူဟု အများက ထင်အောင် ဖုံးကြ၊ ဖိကြသည်။ လိမ်ကြ၊ ညာကြသည်။ ဆင်ခြေ တက်ကြ၊ ထုချေလွှာ တင်ကြသည်။ ကာကွယ်နည်းမျိုးစုံနှင့် ကာကွယ်ကြသည်။ ကိုယ့်အပြစ်ကိုယ် ဝန်မခံလိုကြ။ ပွင့်လင်းမှု၊ ရိုးသားမှု မရှိကြ။ ပွင့်လင်းမှု၊ ရိုးသားမှု ကင်းမဲ့သဖြင့် ယုံကြည်မှုကိုလည်း မတည်ဆောက်နိုင်ကြ။
ဘုရားရှင် လက်ထက်တော်က ကောသလဇနပုဒ်၌ သီတင်း သုံးတော်မူကြသော ရဟန်းတို့သည် ဝါတွင်း သုံးလ အခါ ဘုရားရှင်က နှုတ်ဆက် စကား ပြောကြားပြီး ဝါတွင်းသုံးလ နေထိုင် ကျင့်သုံးပုံကို မေးမြန်းတော်မူ၏။ ရဟန်းတို့က ဝစီပိတ် ကျင့်ကြကြောင်း ဂုဏ်ယူ၍ လျှောက်ထားသော အခါ ဘုရားရှင်က အပြင်းအထန် ကဲ့ရဲ့ ရှုတ်ချ ကန့်ကွက်တော်မူ၏။ တိရစ္စာန် အကျင့် ဖြစ်ကြောင်း၊ တိတ္ထိ အကျင့် ဖြစ်ကြောင်း နှိမ်ချ ပြောဆိုတော်မူ၏။ ဝစီပိတ် ကျင့်ခြင်းသည် အထီးကျန် ကျင့်သုံးရာ ရောက်သည်။
ဘုရားရှင်က အထီးကျန် ဆန်သော အကျင့်မျိုးကို ကြိုက်နှစ်သက်တော် မမူ။ သိုက်သိုက်ဝန်းဝန်း၊ စည်းစည်းလုံးလုံး၊ ညီညီညွတ်ညွတ်၊ ပျော်ပျော်ရွှင်ရွှင်နှင့် လက်တွဲ လုပ်ကိုင် ဆောင်ရွက် နေတာကို မြင်ချင်သည်။ ယဉ်ကျေးမှု ဟူသည် အများနှင့် ညီညွတ်စွာ ပူးပေါင်း ဆောင်ရွက်တတ်ခြင်းဟု ပညာရှင်တို့က ဆိုသည်။ မပြောမဆို ရေငုံ နှုတ်ပိတ် နေတာမျိုးကို ဘုရား မလိုချင်။ ရေလိုက် ငါးလိုက် ပြောသူမျိုးသည် ရိုးသားသူ မဟုတ်သလို မိတ်ဆွေကောင်းလည်း မဟုတ်။ အချင်းချင်း ပွင့်ပွင့်လင်းလင်းနှင့် ပြောသင့်တာပြော၊ ဆိုသင့်တာ ဆိုတာမျိုးကို ဘုရား လိုချင်သည်။ လူဆိုတာ ကိုယ့်အပြစ်ကိုယ် မြင်တာမဟုတ်။ သူများ ထောက်ပြမှသာ မြင်ရတာ များသည်။ အပြစ်တင်လာသူ၊ အပြစ် ပြောလာသူကို ရွှေအိုး ညွှန်ပြသူကဲ့သို့ မှတ်ရမည်ဟု ဘုရားမိန့်သည်။ စေတနာ အရိုးခံနှင့် အပြစ်တင်လာသူကို ကျေးဇူးတင်ရမည်။ အပြစ် ပြောသူရှိမှ အပြစ် တွေ့မည်။ အပြစ်တွေ့မှ ထိုအပြစ်ကို ပြင်နိုင်မည်။ အပြစ်ကို ပြင်နိုင်မှ အပြစ်ကင်းမည်။ အပြစ်ကင်းမှ ကောင်းကျိုးရမည်။ သံဃာကို ဘုရား အလွန် အားထားသည်။ သံဃာ၏ အားကို ဘုရား အလွန် အားကိုးသည်။ ဘုရား မရှိသည့် နောက်ပိုင်း ငါးထောင် သာသနာကို သယ်ပိုး ဆောင်ရွက်မှာက သံဃာ ဖြစ်သည်။ ထို့ကြောင့် ဘုရားရှင်က သံဃာထု အတွင်း စည်းလုံး ညီညွတ်ရေး၊ ယုံကြည်မှု တည်ဆောက်နိုင်ရေးကို ရှေးရှု၍ ဝါကျွတ်လျှင် ပဝါရဏာ ပြုကြဖို့ မိန့်ဆို ပညတ်တော်မူ၏။ အဖွဲ့အစည်း အမျိုးမျိုးတွင် ဗုဒ္ဓ၏ သားတော် သံဃာ အဖွဲ့အစည်းသည် အခိုင်မာဆုံး၊ သက်တမ်း အရှည်ကြာဆုံး အဖွဲ့အစည်း ဖြစ်သည်။
ယနေ့ နှစ်ပေါင်း နှစ်ထောင့်ငါးရာကျော် တိုင်အောင် မိမိတို့ တာဝန်ကို ကျေပွန်အောင် ထမ်းဆောင်၍ ညီညွတ် ခိုင်မြဲစွာ တည်ရှိနေခြင်းသည် အချင်းချင်း ယုံကြည်မှု တည်ဆောက်နိုင်ခြင်းကြောင့် ဖြစ်သည်။ ထိုသို့ ယုံကြည်မှု တည်ဆောက်နိုင်ခြင်းသည် ဥဇုပ္ပဋိပန္နဂုဏ်နှင့် အညီ ရိုးသား ဖြောင့်မတ် ကြခြင်းကြောင့် ဖြစ်သည်။
ရိုးသား ဖြောင့်မတ်သည်ဟု အချင်းချင်း လက်ခံနိုင်ခြင်းသည် ကွယ်ဝှက်မှု မရှိ၊ ထိန်ချန်မှု မရှိ၊ ခိုးကြောင် ခိုးဝှက် မရှိ အချင်းချင်း ပွင့်ပွင့်လင်းလင်း ရှိကြခြင်း ဖြစ်သည်။ ထိုအကျိုးဆက် အားလုံးမှာ ပဝါရဏာ၏ အကျိုးဆက်များ ဖြစ်သည်။ ဆက်စပ် တွေးကြည့်လိုက်တော့ ရဟန်းတော်များ၊ ပဝါရဏာ ပြုသကဲ့သို့ လူတွေလည်း အချင်းချင်း ပဝါရဏာ ပြုကြလျှင် ကောင်းမည်။ မိသားစု အချင်းချင်း၊ ဆွေမျိုး အချင်းချင်း၊ လူမျိုး အချင်းချင်း၊ အဖွဲ့အစည်း အသီးသီးမှာ မိမိမှာ အပြစ်ရှိလျှင် ထောက်ပြ ပြောဆိုဖို့၊ အပြစ်ရှိလျှင် ပြုပြင်ပါမည့် အကြောင်း ရိုးရိုးသားသား၊ လိုလိုလားလား ဖိတ်မန်ရမည်။ အပြစ်ရှိလျှင် တောင်းပန်ရမည်။ ပြုပြင်ရမည်။ ကျေအေးရမည်။ လူသား အချင်းချင်းကြား ဒီလို ကျင့်သုံးနိုင်လျှင် သိပ်ကောင်းမည်။ ချစ်ကြည်မှုတွေ၊ ယုံကြည်မှုတွေ၊ နားလည်မှုတွေ ရမည်။ သံသယတွေ၊ နားလည်မှု လွဲမှားတာတွေ၊ အငြိုးအတေးတွေ အားလုံး ပျောက်သွားမည်။ မျက်နှာချင်း ဆိုင်လိုက်တာနှင့် သံသယတို့ အာဃာတတို့ ဆိုတာ ပျောက်သွားမြဲ ဖြစ်ပါသည်။ လူတွေ အချင်းချင်း ပဝါရဏာ ပြုကြလို့ ပွင့်ပွင့်လင်းလင်း ရှိကြလျှင် ရိုးသားမှုနှင့် ယုံကြည်မှု တည်ဆောက် နိုင်ကြလိမ့်မည်။ ယုံကြည်မှု ရှိလျှင် နားလည်မှု ရလိမ့်မည်။ လူသား အချင်းချင်းကြားမှာ အလိုအပ်ဆုံးက "နားလည်မှု" ပဲ ဖြစ်သည်။ နားလည်မှု နောက်မှာ "ပြေလည်မှု" ဆိုတာ ပါလာသည်။ ဘဝမှာ အရေးကြီးဆုံးက အားလုံး ပြေလည်ဖို့ပဲ ဖြစ်သည်။ ထိုသို့ နားလည်မှုတွေ၊ ပြေလည်မှုတွေ ရကြဖို့ လူတွေလည်း နှစ်စဉ် လူ့ပဝါရဏာ ပြုနိုင်လျှင် သိပ်ကောင်းမည်ဟု တွေးမိသည်။
..................
Sources: wikimyanmar
0 comments:
Post a Comment
မှတ်ချက်တွေကို ဖော်ပြရန် ခဏလေးစောင့်ကြပါ။