ရက္ခိုင့်တပ်မတော်မှ အရှေ့ဖက်စစ်ဒေသတာဝန်ခံ ဒုတိယဗိုလ်မှူးကြီး ကျော်ဟန်အား ဧရာဝတီသတင်းထောက် ကျော်ခက တွေ့ဆုံမေးမြန်းချက်

၂၀၁၅ ခုနှစ်၊ သြဂုတ်လ (၂၈)ရက်နေ့တွင် ရက္ခိုင့်တပ်မတော်မှ အရှေ့ဖက်စစ်ဒေသတာဝန်ခံ ဒုတိယဗိုလ်မှူးကြီး ကျော်ဟန်အား ဧရာဝတီသတင်းထောက် ကျော်ခက တွေ့ဆုံမေးမြန်းခန်း။ (Source : irrawaddynews Youtube မှ ကူးယူဖော်ပြသည်။)  
ကျော်ခ။ မကြာခင်ရက်ပိုင်းမှာပေါ့လေ နေပြည်တော်မှာ နှစ်ဖက်ထိပ်သီးခေါင်းဆောင်တွေ အားလုံးပါဝင်ရေးမူနဲ့ပတ်သက်ပြီးတော့ ဆွေးနွေးကြမယ်လို့သိရတယ်။ အဲဒီဟာနဲ့ပတ်သက်ပြီးတော့ AA အနေနဲ့ ဗိုလ်မှူးကြီးတို့အနေနဲ့ ဘယ်လိုမျှော်လင့်ထားလဲခင်ဗျ။

ဒုဗမက ကျော်ဟန်။ ကျနော်တို့ကတော့ အားလုံးပါဝင်ရေးဆိုတဲ့ မူအပေါ်မှာ ကျနော်တို့တိုင်းရင်းသားလက်နက်ကိုင်တော်လှန်ရေးအဖွဲ့တွေ တော်တော်များများက အဲဒီအပေါ်မှာပဲအခြေခံတယ်ပေါ့နော်။ ထိပ်သီးခေါင်းဆောင် (၅) ဦးနဲ့ SD ကခေါင်းဆောင် (၃) ဦး၊ ပေါင်း (၈)ဦးကိုယ်စားလှယ်ကတော့ အဓိကအားလုံးပါဝင်ရေး NCCT အဖွဲ့ဝင် (၁၇) ဖွဲ့လုံးပါဝင်ရေးဆိုတဲ့ အခြေခံမှာပဲ အဓိကဦးစားပေးဆွေးနွေးမယ်ဆိုပြီး သဘောတူညီချက်တွေရှိပါတယ်။ အဲဒီအပေါ်မှာပဲအခြေခံပြီး အဲဒီခေါင်းဆောင်တွေက ဆွေးနွေးလိမ့်မယ်လို့ထင်ပါတယ်။ 

ကျော်ခ။ အကယ်၍ အဲဒီဆွေးနွေးမှုထဲမှာ အားလုံးပါဝင်ရေးမူနဲ့ပတ်သက်ပြီးတော့ အဲဒီထဲမှာ AAတို့ကို စစ်ရေး၊ နိုင်ငံရေး အာမခံချက်တွေမရဘူး၊ လက်မခံဘူးဆိုလို့ရှိရင် AAအနေနဲ့ ရှေ့ဆက်ဘယ်လိုသွားဖို့ အစီအစဉ်ရှိလဲ။

ဒုဗမက ကျော်ဟန်။ ဒါကတော့ အဲဒီဆွေးနွေးပွဲရဲ့ရလဒ်ကထွက်လာတဲ့အဖြေအပေါ်မှာပဲ ရှေ့ကို ကျနော်တို့သွားမယ့်ခြေလှမ်းတွေကို စဉ်းစားမှာဖြစ်တယ်။ ဒါပေမယ့် ကျနော်ဆိုလိုချင်တာက တစ်ချိန်တုန်းကတော့ တိုက်ဖော်တိုက်ဖက်တွေဖြစ်ခဲ့တယ်။ အခုဒီနေ့ နှစ်ဦးနှစ်ဖက်ကနေ Single Text အပစ်အခတ်ရပ်စဲရေးမူချောစာချုပ်တစ်စောင် ရပြီးပြီပေါ့နော်။ အဲဒီစာချုပ်အပေါ်မှာပဲ အခြေခံပြီး ရှေ့ကိုဘယ်လိုဆက်သွားမလဲဆိုတာကိုပဲ နှစ်ဦးနှစ်ဖက်ကနေစဉ်းစားဖို့လိုတယ်။ ပဋိပက္ခတွေပေါ်မှာ အခြေခံပြီးစဉ်းစားရင် အဲဒီစာချုပ်ဆိုတာလည်း ချုပ်စရာမလိုဘူး။ Single Text ဆိုပြီးလုပ်စရာလည်းမလိုဘူး။ တစ်ချိန်တုန်းပဋိပက္ခတွေတော့ ရှိကြမှာပေါ့။ အခုလည်းရှိနေဆဲပဲဖြစ်တယ်။ ကျနော်တို့ အဲဒါတွေကို ထိန်းညှိဖို့အတွက်၊ ပြယ်ငြိမ်းဖို့အတွက် စာချုပ်ဆိုတာပြီးသွားပြီဖြစ်တယ်။ အဲဒီစာချုပ်ရဲ့ နောက်ဆက်တွဲရလဒ်အပေါ်မှာပဲ ကျနော်တို့တိုင်းပြည်ရဲ့အနာဂတ်အတွက် နှစ်ဦးနှစ်ဖက်အားလုံးပေါင်းပြီးသွားမယ်ဆိုရင်တော့ တိုင်းပြည်အတွက်ရော၊ ကျနော်တို့အားလုံးအတွက်ရော ဝမ်းသာစရာပါပဲ။

ကျော်ခ။ ဗိုလ်မှူးကြီးတို့ ဒီဖက်မှာ တိုင်းရင်းသားခေါင်းဆောင်အစည်းအဝေး ဆွေးနွေးတဲ့အချိန်မှာပဲ နေပြည်တော်ကနေပြီးတော့ ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က သတင်းထုတ်လိုက်တာ တစ်ခုရှိတယ်။ အဲဒါဘာလဲဆိုတော့ ဗိုလ်မှူးကြီးတို့ AA အပါအဝင် MNDAA နဲ့ TNLA ဒီ (၃)ဖွဲ့ကို လက်နက်စွန့်ရမယ်ဆိုပြီးတော့ ပြောဆိုလာတာရှိတယ်။ ဒီအပေါ်မှာ ဗိုလ်မှူးကြီးအနေနဲ့ ဘယ်လိုတုံ့ပြန်ချင်လဲ။ ဘာများပြောချင်လဲ။

ဒုဗမက ကျော်ဟန်။ ဒါကတော့ ကာချုပ်အနေနဲ့ သူ့ဆန္ဒကို သူပြောတာလေ။ သူ့ဆန္ဒကို သူပြောတဲ့အပေါ်မှာတော့ သူ့ကိုဒီလိုမပြောပါနဲ့လို့ ပြောနေဖို့ဆိုတာထက် ကျနော်တို့ ဒီစာချုပ်အပေါ်မှာ နှစ်ဦးနှစ်ဖက် ဘယ်လိုသဘောတူထားတယ်ဆိုတဲ့အချက်ကပဲ အဓိကအရေးကြီးပါတယ်။ အဲဒီစာချုပ်မှာ လက်မှတ်ထိုးမှာဖြစ်တဲ့အတွက် စာချုပ်မှာပါဝင်တဲ့ အခြေခံမူ၊ အခြေခံအချက်အလက်တွေပေါ်မှာပဲ အခြေခံပြီးကာချုပ်အနေနဲ့ ပြောဖို့လိုတယ်လို့မြင်ပါတယ်။ ဒါပေမယ့် ခုနကပြောသလို ဒီ (၃)ဖွဲ့ကိုတော့ ဘယ်လိုအနေအထားမျိုးထားတယ်ဆိုတာကတော့ တပ်မတော်ရဲ့အပိုင်းဖြစ်တယ်။ ကျနော်တို့အခုသွားဖို့ပြင်ဆင်နေတဲ့ (၈)ဦးကိုယ်စားလှယ်အဖွဲ့က ကျနော်တို့ရဲ့ရပ်တည်ချက်အပေါ်မှာ ဆွဲကိုင်ပြီး ဆွေးနွေးမယ့်အခြေခံတွေရှိတယ်။ အဲဒီအခြေခံနဲ့တော့ မကိုက်ညီဘူး။ ဒါပေမယ့် နှစ်ဖက်ဆွေးနွေးတဲ့ဟာမှာပဲ အဲဒီအဖြေကသိလာလိမ့်မယ်။

ကျော်ခ။ တပ်မတော်အနေနဲ့ အစိုးရတို့အနေနဲ့ပေါ့လေ MNDAA၊ TNLA၊ AA ဒီမဟာမိတ် (၃)ဖွဲ့ကိုပေါ့လေ NCA လက်မှတ်ထိုးဖို့အတွက်ကို ကန့်သတ်ထားတာက ဘာ့ကြောင့်လို့ထင်လဲခင်ဗျား။

ဒုဗမက ကျော်ဟန်။ အဲဒါကတော့ တိုက်ပွဲတစ်ခုဆက်ဖော်ချင်တယ်ဆိုရင် သဘောတူညီမှုမရထားတဲ့အဖွဲ့တွေ ရှိဖို့လိုတယ်။ ဥပမာ TNLA က အပစ်အခတ်ရပ်စဲရေးထဲမှာ မပါတဲ့အတွက် TNLA ကိုတိုက်ရင် KIA တပ်မဟာ (၄) အနေနဲ့လည်း ထိတွေ့မှုဖြစ်နိုင်တယ်။ တစ်ဖက်မှာလည်း နောက်တခြားသော SSPP အဖွဲ့တွေနဲ့လည်း ထိတွေ့မှုဖြစ်နိုင်တယ်။ ဆိုတော့ TNLA မှာဖြစ်ရင် KIAနယ်မြေနဲ့ SSPPနယ်မြေမှာဖြစ်တာနဲု့အတူတူပဲဖြစ်တယ်လေ။ အစိုးရဖက်ကတော့ ဘယ်လိုစီမံကိန်းရှိလဲတော့ ကြိုပြီးပြောဖို့ဆိုတာထက် ကျနော်တို့တော်လှန်ရေးနယ်မြေထဲမှာ မြင်နေတဲ့အမြင်ကတော့ အဲလိုမြင်တယ်။ TNLA ကမပါဘူးဆိုရင် TNLA ကိုအစိုးရကတိုက်လာမယ်ဆိုရင် KIA နဲ့လည်း ထိတွေ့မှုဖြစ်မှာပဲ။ ဒါဆိုရင် NCA စာချုပ်အပေါ်မှာ အများကြီး ငြိစွန်းမှုတွေ၊ ထိခိုက်မှုတွေ၊ စိုးရိမ်စရာတွေ၊ ဆိုးကျိုးတွေဖြစ်စေနိုင်တာပေါ့နော်။ 

ကျော်ခ။ ခုနကပြောသလိုဆိုရင် အားလုံးပါဝင်ရေးမူကို လက်မခံရင် NCA ဆိုတဲ့အဓိပ္ပာယ်ရဲ့သက်ရောက်မှုက ဘယ်လိုဖြစ်သွားနိုင်လဲ။

ဒုဗမက ကျော်ဟန်။ အစိုးရအနေနဲ့ အရင် ၂၀၁၁၊ ၂၀၁၂ ကတည်းက Bilateral Agreement နဲ့သွားလာခဲ့တာ။ ကျနော်တို့ ၂ နှစ်ကျော်ကျော်သွားလာခဲ့တာနော်။ တစ်ဖွဲ့ချင်းစီသွားတဲ့အပေါ်မှာ ဒီနေ့ထိ တစ်ဖွဲ့ချင်းစီရဲ့ အဆုံးစွန်ထိအနေအထားတောင်မရောက်ဘူး။ အဲဒါကြောင့် နှစ်ဖက်လုံးကနေ ကျနော်တို့စုပြီးသွားရင်ပိုကောင်းတယ်။ အားလုံးရဲ့အသံတစ်သံတည်းဖြစ်အောင်ဆိုတဲ့အပေါ်မှာ အစိုးရဖက်ကရော တိုင်းရင်းသားလက်နက်ကိုင်တော်လှန်ရေးအဖွဲ့ကရော အဲဒီအပေါ်မှာ အဲဒီအမြင်တွေရှိတဲ့အတွက် အားလုံးနဲ့ဆိုင်တဲ့ နှစ်ဦးနှစ်ဖက်လုံးနဲ့ဆိုင်တဲ့ Single Text တစ်စောင်ကို အခုဆိုရင်ရေးဆွဲလို့ပြီးပြီ။ NCA ဆိုတာ တစ်နိုင်ငံလုံးအပစ်အခတ်ရပ်စဲရေးစာချုပ်ဖြစ်တယ်။ တစ်နိုင်ငံလုံးအပစ်အခတ်ရပ်စဲရေးစာချုပ်ထဲမှာ အဲဒီနိုင်ငံထဲမှာ တည်ရှိနေတဲ့ လက်နက်ကိုင်တော်လှန်ရေး အဖွဲ့အစည်းတွေအားလုံးမပါဘူးဆိုရင် အဲဒါတစ်နိုင်ငံလုံးအပစ်အခတ်ရပ်စဲရေးစာချုပ်ပေါ်မှာ လက်မှတ်ထိုးတဲ့အဖွဲ့တွေရှိရင်တောင်မှ အဲဒီအဖွဲ့တွေဟာ တစ်နိုင်ငံလုံးအပစ်အခတ်ရပ်စဲရေးစာချုပ်မှာ လက်မှတ်ထိုးတယ်လို့ ပြောလို့မရဘူး။

ကျော်ခ။ အခုအစိုးရက AA အပေါ်မှာ ထားတဲ့သဘောထားက ဘယ်လိုရှိတယ်လို့ သုံးသပ်လို့ရမလဲ။

ဒုဗမက ကျော်ဟန်။ AA ပေါ်မှာ ရှိနေတဲ့သဘောထားကတော့ ဥပမာ ရခိုင်ပြည်သူတွေက ရက္ခိုင့်တပ်မတော်(AA)ကို အများကြီးထောက်ခံမှုတွေရှိတယ်။ မျှော်လင့်ချက်တွေရှိကြတယ်။ ရခိုင်ပြည်သူတွေက မျိုးဆက်သစ်ရက္ခိုင့်တပ်မတော် ကျောင်းသားလူငယ်တွေ၊ ရဟန်းသံဃာလူငယ်တွေ ဦးဆောင်လာတဲ့ ဒီခြောက်နှစ်တာကာလမှာ တပ်တည်ဆောက်လာတဲ့ အနေအထားကိုကြည့်ပြီး ရခိုင်ပြည်သူတွေကနေ ရက္ခိုင့်တပ်မတော်ကို အားကိုးမှုတွေ၊ တန်ဖိုးထားမှုတွေ၊ မျှော်လင့်ချက်တွေရှိလာကြတယ်။ အဲဒီအပေါ်မှာ ရက္ခိုင့်တပ်မတော်က ဒီထက်ပိုပြီးပြည်သူတွေနဲ့ တစ်သားတည်းကျသွားဖို့ကို အစိုးရအနေနဲ့စိုးရိမ်နိုင်တယ်။ စိုးရိမ်တယ်လို့ ကျနော်ထင်တယ်။ ဒါပေမယ့် ဒါဟာစိုးရိမ်စရာမဟုတ်ပါဘူး။ ပြည်သူနဲ့ တပ်မတော်တစ်သားတည်းကျတယ်ဆိုတာက တိုင်းပြည်ကို ပြန်လည်တည်ဆောက်တဲ့အခါမှာ ဒါအင်အားတစ်ခုဖြစ်ပါတယ်။ အစိုးရနဲ့ ကျနော်တို့ သဘောထားတစ်ခုခုပေါ်မှာ အခြေခံပြီးအတူတူဖြစ်သွားလို့ရှိရင် ကျနော်တို့ကို ပြည်သူကအားကိုးနေတဲ့ မျှော်လင့်ချက်ထားနေတဲ့ မျှော်လင့်ချက်ဟာ တစ်တိုင်းပြည်လုံးအတွက်ဖြစ်ပါတယ်။ ဒါတစ်ဦးတစ်ယောက်တည်းအတွက်မဟုတ်ပါဘူး။ အဲဒါကြောင့် အစိုးရအနေနဲ့ ကျနော်တို့ ရက္ခိုင့်တပ်မတော်ကို ရခိုင်ပြည်သူတွေက တန်ဖိုးထားတာ၊ မျှော်လင့်ချက်ထားတာကို ဝမ်းသာကြိုဆိုရမှာဖြစ်ပါတယ်။ ဒါတိုင်းပြည်ပြန်လည်တည်ဆောက်ရေးမှာ အဓိကအခရာကျပါတယ်။ ပြည်သူနဲ့တပ်မတော်တစ်သားတည်းကျတယ်ဆိုတဲ့ အနေအထားအပေါ်မှာ။

ကျော်ခ။ ရခိုင်နိုင်ငံရေးသမားတစ်ချို့ပြောနေတာရှိတယ်။ အဲဒါဘာလဲဆိုတော့ AA ကိုသူတို့ထောက်ခံတယ်။ ပြီးတော့ အစိုးရအနေနဲ့ AA ကိုရခိုင်ပြည်နယ်အတွင်းကို ဝင်လာမှာစိုးရိမ်တဲ့အချက်က တရုတ်နိုင်ငံရဲ့တရုတ်စီမံကိန်းတွေ ဥပမာ Gas ပိုက်လိုင်းတို့ တခြားတရုတ်ရဲ့စီမံကိန်းကြီးတွေကို ရိုက်ခတ်မှုတစ်ချို့ရှိလာမှာ စိုးရိမ်တဲ့အတွက် AA ကို သူတို့ကန့်သတ်ထားတဲ့အထဲမှာ ဒီသဘောထားတွေပါတယ်လို့ သုံးသပ်ကြတာရှိတယ်။ အဲဒီသုံးသပ်ချက်တွေက ဘယ်လောက်ထိ မှန်တယ်လို့ထင်လဲ။

ဒုဗမက ကျော်ဟန်။ အဲဒီသုံးသပ်ချက်က တစ်ချို့ကတော့ ပဋိပက္ခဖြစ်နေတဲ့အနေအထားမှာ ဒါစိုးရိမ်စရာရှိနိုင်တယ်။ ကျနော်တို့ နှစ်ဦးသဘောတူ အပစ်အခတ်ရပ်စဲလိုက်ပြီဆိုရင် ဒါကစိုးရိမ်စရာမဟုတ်ဘူး။ ဒါဟာ အစိုးရနဲ့ကျနော်တို့ တိုင်းပြည်ရဲ့အနာဂတ်အတွက် အဲဒီ Gas ပိုက်လိုင်းရဲ့အခြေအနေပေါ်မှာ ကျနော်တို့အပြန်အလှန်ညှိနှိုင်း နှစ်ဦးနှစ်ဖက်သဘောတူဆွေးနွေးရမယ့်အချက်တွေ အများကြီးရှိတယ်။ ဒါကလည်း စိုးရိမ်စရာမဟုတ်ပါဘူး။ ပဋိပက္ခဖြစ်နေမှ စိုးရိမ်စရာပါ။ ပဋိပက္ခမဖြစ်ဘူးဆိုရင် ပိုပြီးလုံခြုံသွားတယ်။ အစိုးရလုပ်ဖို့အလုပ်အတွက်လည်း ပိုပြီးအကျိုးရှိစေသလို၊ ကျနော်တို့ဒေသဖွံ့ဖြိုးရေးလုပ်ဖို့အတွက်လည်း ကျနော်တို့အတွက်၊ ရခိုင်ပြည်သူတွေအတွက်လည်းပိုပြီးအကျိုးရှိပါတယ်။ ဒါကစိုးရိမ်စရာမဟုတ်ပါဘူး။ ဒါတကယ့်ပိုပြီးလုံခြုံတဲ့အနေအထားတောင် ရောက်သွားနိုင်ပါတယ်။ 

ကျော်ခ။ AA နဲ့တခြားရခိုင်တပ်ဖွဲ့တွေဖြစ်တဲ့ ALP ၊ ANC တို့ရဲ့ (၃)ဖွဲ့ ဆက်ဆံရေးအခြေအနေက ဘယ်လိုရှိလဲခင်ဗျ။

ဒုဗမက ကျော်ဟန်။ ကျနော်တို့ဆက်ဆံရေးကတော့ အမျိုးသားလွတ်မြောက်ရေးမူအပေါ်မှာတော့ ကျနော်တို့အားလုံးက အတူတူ၊ တစ်သံတည်းပါပဲ။ ရည်ရွယ်ချက်လည်းတူတယ်။ ဦးတည်ချက်လည်းတူတယ်။ ဒါပေမယ့်သွားနေတဲ့နေရာမှာ ကိုယ့်လမ်းနဲ့ကိုယ်၊ ကိုယ့်အနေအထားနဲ့ စုဖွဲ့ပြီးသွားတယ်။ ဒါပေမယ့် ရည်ရွယ်ချက်နဲ့ ဦးတည်ချက်ကအတူတူပါပဲ။

ကျော်ခ။ အစိုးရဖက်က တစ်ချို့ပြောဆိုနေတာရှိတယ်။ အဲဒါဘာလဲဆိုတော့ AA ကို NCA မှာ လက်မှတ်ထိုးဖို့မလိုဘူး။ AA ဟာ KIO လက်အောက်ကပေါက်ဖွားလာတဲ့ လက်အောက်ခံအဖွဲ့ဖြစ်တဲ့အတွက်ကြောင့် အဲဒီနယ်မြေမှာလည်း ရပ်တည်နေတဲ့အဖွဲ့ဖြစ်တယ်ဆိုပြီးတော့လည်းပြောတယ်။ အဲဒီအတွက်ကြောင့် KIOနဲ့လက်မှတ်ထိုးလိုက်လို့ရှိရင် တပါတည်းကျွဲကူးရေပါပုံစံမျိုးဖြစ်မယ်ဆိုတာမျိုး ပြောနေတာတွေရှိတယ်။ ဒီအပေါ်မှာ ဗိုလ်မှူးကြီးအနေနဲ့ ဘယ်လိုတုံ့ပြန်ပြောဆိုချင်တာများရှိလဲ။

ဒုဗမက ကျော်ဟန်။ ကျနော်တို့ဟာ KIA နဲ့ ကျနော်တို့ Arakan Army က သီးခြားအဖွဲ့အစည်းတွေဖြစ်ပါတယ်။ ကျနော်တို့ရဲ့စစ်ဦးစီးချုပ်က ထွန်းမြတ်နိုင်ဖြစ်ပါတယ်။ KIA ရဲ့စစ်ဦးစီးချုပ်က ဗိုလ်ချုပ်ကြီး ဂမ်ရှောင်ဖြစ်ပါတယ်။ ကျနော်တို့ ဖွဲ့စည်းပုံကလည်း ကိုယ့်ဖွဲ့စည်းပုံနဲ့ကိုယ်ပဲဖြစ်တယ်။ KIA ရဲ့ဖွဲ့စည်းပုံလည်း KIA ရဲ့ဖွဲ့စည်းပုံပဲ။ ဘတ်တံဆိပ်ကအစ ရပ်တည်ချက်၊ ရည်ရွယ်ချက်၊ ဦးတည်ချက်တွေကအစ သီးခြားစီအသွင်သဏ္ဍာန်ဆောင်တဲ့ ရပ်တည်ချက်နဲ့ပဲရှိကြတယ်။ KIAဆီမှာ ကျနော်တို့စစ်သင်တန်းသွားတက်တာပဲ ဖြစ်ပါတယ်။ အခုဆိုရင် ကျနော်တို့ ကိုယ့်ဒေသမှာ(ရခိုင်နယ်စပ်ဒေသ)မှာ အတိုင်းအတာတစ်ခုထိ နေရာယူနေပြီဖြစ်တယ်။ တာဝန်ယူနေပြီဖြစ်တယ်။ အဲဒီနေရာမှာ ကချင်တစ်ယောက်မှမပါ ပါဘူး။ သီးခြားလွတ်လွတ်လပ်လပ် ကျနော်တို့ရဲ့စီမံခန့်ခွဲမှုကို ရက္ခိုင့်တပ်မတော်ရဲ့ခေါင်းဆောင်တွေကပဲ စီမံခန့်ခွဲတာပဲဖြစ်တယ်။ KIA ကစီမံခန့်ခွဲတာမဟုတ်ဘူး။ စစ်ပညာသင်ယူတဲ့အတွက် ကျနော်တို့ကို KIA ကပေါက်ဖွားလာတယ်လို့ဆိုရင် ဥပမာအနေနဲ့ပြောရမယ်ဆိုရင် “ဗိုလ်ချုပ်ဦးဆောင်ခဲ့တဲ့ ရဲဘော်သုံးကျိပ်ဟာ ဘယ်နေရာမှာသွားပြီး စစ်သင်တန်းယူခဲ့ပါလဲ” ကျနော်ကမေးချင်ပါတယ်။ ဒါဆိုရင် ကျနော်တို့ရက္ခိုင့်တပ်မတော်ကို စစ်သင်တန်းသင်ယူတဲ့အတွက် ကချင်ပြည်မှာပဲပေါက်ဖွားတယ်။ ကချင်ပြည်ကိုပဲသွားပါဆိုရင် အဲဒီမြန်မာ့တပ်မတော်ကိုလည်း ဗိုလ်ချုပ်အောင်ဆန်းတို့ စစ်ပညာသင်ခဲ့တဲ့နေရာသို့ သွားပါဆိုပြီး ကျနော်တို့ပြောရမလိုဖြစ်နေတယ်။ 

ကျော်ခ။ AA အနေနဲ့လက်ရှိငြိ်မ်းချမ်းရေးဖြစ်စဉ်မှာ အားလုံးပါဝင်ရေးမူအပေါ်မှာ ရပ်တည်နေတဲ့အဖွဲ့အနေနဲ့ပေါ့လေ လက်ရှိသွားနေတဲ့အပေါ်မှာ ဘယ်လိုမျိုးဖြစ်စေချင်လဲ AA ရဲ့သဘောထားကို သိပါရစေ။

ဒုဗမက ကျော်ဟန်။ ကျနော်တို့ သဘောထားက ကျနော်တို့ တစ်ချိန်တုန်းက ပဋိပက္ခဖြစ်ပြီး တိုက်နေခိုက်နေကြတဲ့အချိန်မှာ အဲဒီပဋိပက္ခက သူလွန်တယ်၊ ကိုယ်လွန်တယ်၊ သူနာတယ်၊ ကိုယ်နာတယ်၊ ကိုယ်သာတယ်ဆိုတာရှိခဲ့ပါတယ်။ ဒါက အစိုးရရဲ့ရပ်တည်ချက်နဲ့ တခြားလက်နက်ကိုင်တော်လှန်ရေးအဖွဲ့အစည်း ရပ်တည်ချက်နဲ့ မူမတူတဲ့အပေါ်မှာ ဖြစ်ကြတဲ့ပဋိပက္ခတွေဖြစ်တယ်။ အဲဒီပဋိပက္ခတွေကို ချုပ်ငြိမ်းဖို့အတွက် တစ်နိုင်ငံလုံးအပစ်အခတ်ရပ်စဲရေးစာချုပ်၊ အချောသပ်စာချုပ်ဆိုတာတစ်ခု အခုရလာပြီနော်။ အဲဒီစာချုပ်ကတစ်ဖက်သတ်ချုပ်ထားတဲ့စာချုပ်မဟုတ်ဘူး။ နှစ်ဖက်လုံးက ပူးပေါင်းပြီးရေးဆွဲထားတဲ့ သဘောတူစာချုပ်ဖြစ်တယ်။ ဒီစာချုပ်ကိုရလာပြီဆိုရင် ဒီစာချုပ်ကို အကောင်အထည်ဖော်ဘို့ပဲလိုတယ်။ ဆိုတော့ ဒီစာချုပ်ကိုအကောင်အထည်ဖော်ဘို့အတွက် ဒီစာချုပ်အပေါ်မှာ မြန်မာတစ်နိုင်ငံလုံးမှာရှိနေတဲ့ လက်နက်ကိုင်တပ်ဖွဲ့တွေနဲ့ ဒီစာချုပ်ကအားလုံးအဖွဲ့နဲ့ဆိုင်တယ်။ ဒီစာချုပ်ကို အားလုံးအဖွဲ့ပါဝင်ခွင့်မပြုဘူးဆိုရင် တစ်နိုင်ငံလုံးအပစ်အခတ်ရပ်စဲရေးကို မလိုချင်ဘူးလို့မြင်တယ်။ ကျနော်တို့ သဘောထားကတော့ ရှေးပဝေသဏီကတည်းက ဖြစ်ခဲ့ရတဲ့စစ်ပွဲတွေ၊ တိုက်ပွဲတွေ၊ ပြဿနာတွေကို ဒီ NCA စာချုပ်ကနေတစ်ဆင့် နိုင်ငံရေးတွေ့ဆုံဆွေးနွေးမှုတွေကိုသွားဖို့ တိုင်းပြည်ပြန်လည်ထူထောင်ဖို့ အမျိုးသားရင်ကြားစေ့ရေးအတွက် အဓိကအခရာက ဒီ NCA စာချုပ်ဖြစ်ပါတယ်။ ဒီ NCA စာချုပ်မှာ တစ်နိုင်ငံလုံးမှာ ရှိနေတဲ့ လက်နက်ကိုင်တပ်ဖွဲ့တွေအားလုံးမပါဘူးဆိုရင် ဒါဟာ NCA စာချုပ်လို့ မခေါ်ဆိုနိုင်ပါဘူး။ မဖြစ်လာနိုင်ပါဘူး။ ပဋိပက္ခဖြစ်လာရင် ဒီ NCA စာချုပ်လည်း အချိန်မရွေးပျက်စီးသွားနိုင်ပါတယ်။ တစ်ချိန်တုန်းက ဗိုလ်ချုပ်အောင်ဆန်းအပါအဝင်တိုင်းရင်းသားခေါင်းဆောင်တွေနဲ့ ချုပ်ဆိုခဲ့တဲ့ စာချုပ်တွေနဲ့ စာချုပ်ရဲ့ရလဒ်ဟာ ဒီနေ့ထိအကောင်အထည်မပေါ်သလို ဒီ NCA စာချုပ်ဟာလည်း နှစ်ဖက်လုံးက ရိုးသားမှုမရှိဘူးဆိုရင် အဲလိုပဲ နောက်ထပ်နှစ်ပေါင်း (၆၀)ကျော်လောက်ပြန်ပြီး ခရီးဆက်ရပါအုံးမယ်။

ကျော်ခ။ အဲဒီမှာ သတိသွားရလို့ အစိုးရအခုပြောနေတဲ့ တစ်ချို့လက်မခံနိုင်တဲ့အဖွဲ့တွေဆိုပြီးပြောနေတယ်။ အဓိက MNDAA ရယ် ဒီမဟာမိတ် (၃)ဖွဲ့ပေါ့လေ။ နိုင်ငံတော်ရဲ့အချုပ်ခြာအာဏာကို ထိခိုက်တယ်လို့ပြောတယ်။ အခုသူတို့လက်ခံတဲ့အဖွဲ့တွေဟာလည်း အစိုးရနဲ့တိုက်ခဲ့တာပဲ။ အခုလည်းတိုက်ခဲ့တာပဲ။ တခြားနှစ်ပေါင်းများစွာတိုက်ခဲ့တဲ့အဖွဲ့တွေကိုတောင် လက်ခံနိုင်သေးတာ ဘာဖြစ်လို့ ဒီအဖွဲ့တွေကျမှ အချုပ်ခြာအာဏာကို ထိခိုက်ထိပါးတယ်ဆိုပြီးတော့မှ ချန်လှပ်ပြောဆိုတယ်လို့များ မြင်မိလဲခင်ဗျား။

ဒုဗမက ကျော်ဟန်။ အဓိကတော့ ဒါဟာ အငြိုးအတေးပေါ့ဗျာ။ လောက်ကိုင်စစ်ပွဲမှာ တပ်မတော်ဖက်က အကျအဆုံးတွေတော်တော်များတယ်။ အဲဒီအပေါ်မှာ ခံစားချက်တွေဖြစ်ကြတယ်။ အဲဒီခံစားချက်တွေအပေါ်မှာ ဒီလိုအခြေခံ၊ ဒီလိုဆုံးဖြတ်ချက်တွေ၊ သဘောတရားတွေထွက်လာတယ်လို့ပဲ ကျနော်မြင်ပါတယ်။

( ပြီး)

____ရက္ခိုင့်တပ်မတော် - သတင်းနှင့် ပြန်ကြားရေးဌာန

Share on Google Plus

About Kyauk Phru Net

This is a short description in the author block about the author. You edit it by entering text in the "Biographical Info" field in the user admin panel.