နှစ်နိုင်ငံ ဆက်ဆံရေး တင်းမာမှု လျှော့ချရန် သဘောတူညီခဲ့ရာတွင် မိမိတို့ဘက်က တောင်ကိုရီးယားကို အလျှော့ပေး တောင်းပန်မှု လုံးဝ မရှိခဲ့ဟု မြောက်ကိုရီးယားက ကြေညာလိုက်သည်။
တောင်နှင့်မြောက် ကိုရီးယား နှစ်နိုင်ငံတို့သည် ပြီးခဲ့သည့်လက ဆက်ဆံရေး အေးခဲပြီး နယ်စပ်ဒေသတွင် အပြန်အလှန် ပစ်ခတ်မှုများ ဖြစ်ပွားခဲ့သည်။ နှစ်နိုင်ငံကြား နယ်နိမိတ်အဖြစ် သတ်မှတ်ထားသည့် စစ်မဲ့ဇုန်တွင် ကင်းလှည့်နေသည့် တောင်ကိုရီးယား စစ်သည်နှစ်ဦး မြေမြှုပ်မိုင်း နင်းမိပြီး ခြေထောက်များ ဆုံးရှုံးခဲ့ရာမှ ပြဿနာ အစပြုသည်။ တောင်ကိုရီးယားက ယင်းမြေမြှုပ်မိုင်းကို မြောက်ကိုရီးယားက ထောင်ထားခြင်းဟု စွပ်စွဲခဲ့သည်။
ထို့နောက်တွင် တောင်ကိုရီးယားက နယ်စပ်အနီးရှိ မြောက်ကိုရီးယား ဆန့်ကျင်ရေး ဝါဒဖြန့် စပီကာများကို ဖွင့်လှစ်ခဲ့သည်။ မြောက်ကိုရီးယားက ထိုအသံလွှင့်စက် တစ်ခုကို အမြောက်ဖြင့် လှမ်းပစ်ပြီး ယင်းကို တောင်ကိုရီးယားက တုံ့ပြန်ပစ်ခတ်သည့်နောက် အခြေအနေ အတင်းမာဆုံး ဖြစ်လာသည်။ ထို့နောက်တွင်မူ နှစ်နိုင်ငံ ထိပ်တန်း ကိုယ်စားလှယ်များက အပြန်အလှန် ဆွေးနွေးကာ တင်းမာမှုကို လျှော့ချရန် ဩဂုတ် ၂၅ ရက်တွင် သဘောတူညီခဲ့သည်။
တောင်ကိုရီးယား မီဒီယာများက အဆိုပါ သဘောတူညီမှုတွင် မြောက်ကိုရီးယားဘက်က ဗုံးထောင်မှုနှင့် ပတ်သက်၍ ပြန်လည် တောင်းပန်ခဲ့သလို တောင်ကိုရီးယားကလည်း နယ်စပ်ရှိ စပီကာများကို ပိတ်ပေးခဲ့ကြောင်း ဖော်ပြခဲ့သည်။ သို့သော်လည်း မြောက်ကိုရီးယား၏ ဩဇာကြီးမားသည့် အမျိုးသား ကာကွယ်ရေး ကော်မရှင်က မိမိတို့သည် မည်သည့်ကဏ္ဍတွင်မျှ တောင်ကိုရီးယားကို တောင်းပန်ချဉ်းကပ်မှု မရှိခဲ့ဟု ကြေညာချက် ထုတ်ပြန်ခဲ့သည်။
“ကိုရီးယား ဘာသာစကားကိုတောင် သူတို့တွေ သေချာမတတ်ကြတော့ပါဘူး။ ကိုရီးယား ဝေါဟာရတွေရဲ့ အဓိပ္ပါယ်တွေ၊ ဖွင့်ဆိုချက်တွေကို သူတို့ မသိကြတော့ဘူး”ဟု ကော်မရှင်၏ ကြေညာချက်တွင် လှောင်ပြောင် ရေးသားထားသည်။ မြောက်ကိုရီးယား အစိုးရပိုင် ကေစီအန်အေ သတင်းဌာနကလည်း တောင်ကိုရီးယား၏ လှည့်ဖျားကြေညာမှုမျိုးက နှစ်နိုင်ငံ ဆက်ဆံရေး တစ်ကျော့ပြန် တင်းမာလာစေမည့် လှုံ့ဆော်မှု ဖြစ်သွားနိုင်ကြောင်း ခြိမ်းခြောက် ရေးသားခဲ့သည်။
တောင်ကိုရီးယား အစိုးရ တာဝန်ရှိသူ တစ်ဦးကမူ နှစ်ဖက်စလုံး အနေဖြင့် ပြီးစီးခဲ့ပြီဖြစ်သည့် ကိစ္စတစ်ခုမှ စကားလုံး အသုံးအနှုန်းများအကြောင်း ပြန်လည် ဖော်ထုတ်ကာ တင်းမာမှုကို အစမပျိုးသင့်ဟု ဆိုသည်။
မြောက်ကိုရီးယားဘက်ကမှ ကြေညာချက်တွင် “တောင်ကိုရီးယားဘက်မှ မိမိတို့သည် ဗုံးပေါက်ကွဲမှုအတွက် နောင်တရနေသည်ဟု သုံးနှုန်းထားကြောင်း၊ နောင်တဆိုသော စကားလုံးသည် ဆေးရုံတွင် လူနာကို သတင်းသွားမေးသည့် စာနာသနားမှုမျိုးနှင့် မည်သို့မျှ မပတ်သက်ကြောင်း၊ မိမိတို့၏ သဘောထားသည် ထိုထက်မပိုဘဲ တောင်ကိုရီးယားကို တောင်းပန်မှု လုံးဝ မရှိခဲ့ကြောင်း” စသဖြင့် ဖော်ပြထားသည်။
http://www.7daydaily.com/
0 comments:
Post a Comment
မှတ်ချက်တွေကို ဖော်ပြရန် ခဏလေးစောင့်ကြပါ။