ဓာတ်ပုံ AP
အီဂျစ်သမ္မတကို ထောက်ခံသူများက ဆန္ဒပြသူများကို တိုက်ခိုက်နေစဉ်။ ဖေဖော်ဝါရီ ၂၊ ၂၀၁၁။
တဘက်နဲ့တဘက် ခဲတွေနဲ့ ပစ်ပေါက်တာတွေ၊ ထိုးကျိတ်တာတွေလည်း ဖြစ်ခဲ့တဲ့အကြောင်း ရုပ်မြင်သံကြားတွေက ပြသနေပါတယ်။ ဒီလိုတိုက်ခိုက်မှုတွေ မဖြစ်ရအောင် အီဂျစ်တပ်ဖွဲ့တွေက သေနတ်နဲ့ သတိပေး ပစ်ဖောက်မှုတွေ လုပ်ခဲ့ရပါတယ်။
သမ္မတ မူဘာရက်ခ်ကို ထောက်ခံသူတွေက ဆန့်ကျင်သူတွေကို မီးလောင်ဗုံးတွေနဲ့ ပစ်ခဲ့ပါတယ်။ ကိုင်ရိုမြို့က ကမ္ဘာကျော် ပြတိုက်ကြီးထဲကိုလည်း သမ္မတ ထောက်ခံသူတွေက မီးလောင်ဗုံး အနည်းဆုံး ၂ လုံး ပစ်သွင်းခဲ့တယ်လို့ မျက်မြင်သက်သေတွေက ပြောကြပါတယ်။ ဒါပေမဲ့လည်း အဲဒီဗုံးတွေကို ခပ်မြန်မြန် ငြိမ်းသတ်နိုင်ခဲ့ပါတယ်။
မနေ့ကညပိုင်း ကိုင်ရိုမြို့က လွတ်မြောက်ရေး ရင်ပြင်အနီး အချင်းချင်း ပဋိပက္ခဖြစ် တိုက်ခိုက်မှုတွေကြောင့် လူ ၃ ဦး သေဆုံးခဲ့ပြီး ၆၀၀ ကျော် ဒဏ်ရာရခဲ့တယ်လို့ ကျန်းမာရေး ၀န်ကြီးဌာနက ပြောပါတယ်။
အစိုးရက ညမထွက်ရအမိန့် ထုတ်ပြန်ထားပေမဲ့လည်း ဆန္ဒပြသူတွေက အမိန့်ကို ဖီဆန်ပြီး နေ့ရော ညပါ ဆန္ဒတွေ ပြနေကြတာ ၉ ရက် ရှိသွားခဲ့ပါပြီ။
သံချပ်ကာကားတွေနဲ့ စစ်သားတွေ လမ်းတွေမှာရှိတယ် ဆိုပေမဲ့လည်း ဆန္ဒပြသူတွေကို ဘာမှ အနှောင့်အယှက် မပေးကြပါဘူး။
မနေ့တုန်းက ဆန္ဒပြသူတွေထဲမှာ အရပ်ဝတ်နဲ့ရဲတွေ ၀င်ရောက်နေတယ်လို့ ဆန္ဒပြသူတွေက ပြောကြပါတယ်။ ပြည်ထဲရေး ၀န်ကြီးကတော့ ဒီအချက်ကို ငြင်းပါတယ်။
သမ္မတ မူဘာရက်ခ်ကတော့ နောက်အစိုးရ ဖွဲ့တဲ့အခါ သူ ထပ်မပါတော့ဘူးလို့ ပြောထားပါတယ်။ ဆန္ဒပြသူတွေကတော့ သူ့ကို အခုဆင်းပေးရမယ်လို့ တောင်းဆိုနေကြတာပါ။
အီဂျစ်မှာ နိုင်ငံရေး အပြောင်းအလဲကို ချက်ချင်းလုပ်ပေးဖို့ အနောက် အင်အားကြီး နိုင်ငံတွေက တိုက်တွန်းနေတာကို အီဂျစ် နိုင်ငံခြားရေး ၀န်ကြီးဌာနက ငြင်းပယ်လိုက်ပါတယ်။ အီဂျစ်ရဲ့ ပြည်တွင်းရေးကို နိုင်ငံခြား တိုင်းပြည်တွေက ၀င်ပြီးစွက်ဖက်တဲ့ ရည်ရွယ်ချက်နဲ့ အခုလို တိုက်တွန်းနေကြတာလို့ မနေ့က ထုတ်ပြန်တဲ့ အီဂျစ် နိုင်ငံခြားရေး ၀န်ကြီးဌာနရဲ့ ကြေညာချက်မှာ ဖော်ပြထားပါတယ်။
ဆန္ဒပြမှုတွေ မရပ်ရင် တွေ့ဆုံဆွေးနွေးမှုတွေလည်း ရှိလာမှာ မဟုတ်ဘူးလို့ အီဂျစ် ဒု-သမ္မတက ပြောတဲ့အကြောင်း၊ စစ်တပ်အရာရှိတွေက လူတွေကို အိမ်ပြန်ကြဖို့ အကြိမ်ကြိမ် တိုက်တွန်းနေတဲ့အကြောင်း အယ်လ်ဂျာဇီးရား ရုပ်မြင်သံကြားမှာ ဖော်ပြနေပါတယ်။
..........
VOA
0 comments:
Post a Comment
မှတ်ချက်တွေကို ဖော်ပြရန် ခဏလေးစောင့်ကြပါ။