------------
ရခိုင်တေးရေးဆရာ ဦးရွှေကျော်ထွန်းသည် ရန်ကုန်မြို့ သင်္ကန်းကျွန်းစံပြဆေးရုံတွင် ယမန်နေ့နံနက် ၇ နာရီ အချိန်တွင် ကျောက်ကပ် ရောဂါဖြင့် ကွယ်လွန်သွားကြောင်း သတင်းရရှိသည်။
“မြောက်ဦးကနေ နေမကောင်းလို့ဆေးကုဖို့ ရန်ကုန်ကိုရောက်နေတာက ၃ လလောက်ရှိပြီပေါ့နော်။ သူနေ မကောင်းဖြစ်နေတာတော့ နှစ်အနည်းငယ် ကြာနေပါပြီ။ ဗုဒ္ဓဟူးနေ့ နံနက် ၇ နာရီမှာ သင်္ကန်းကျွန်းမြို့နယ် စံပြဆေးရုံမှာ ကျောက်ကပ်ရောဂါနဲ့ကွယ်လွန်သွားတာဖြစ်ပါတယ်“ ဟုသူနှင့် ဆွေမျိုးတော်စပ်သူတဦးက ပြောသည်။
သူသည် လွန်ခဲ့သည့်နှစ် အနည်းငယ်က မန္တလေးဆေးရုံကြီး၌ ပထမဆုံးအဖြစ် ကျောက်ကပ်ကို အစားထိုး ကုသခံယူခဲ့သူတဦး ဖြစ်သည်ဟုသိရသည်။
ဦးရွှေကျော်ထွန်းသည် အခြေခံပညာ အလယ်တန်းပြ ကျောင်းဆရာအလုပ်ဖြင့် အသက်မွေးဝမ်းကျောင်းပြု ထမ်းဆောင်ခဲ့ပြီးနောက် မြန်မာနိုင်ငံ၌ ရခိုင်တေးရေးဆရာတဦး အနေဖြင့် နာမည်ကျော်ကြား ခဲ့သူတဦး ဖြစ်သည်။
“သူကွယ်လွန်သွားတဲ့အတွက် ရခိုင်အနုပညာလောကမှာ ပန်းတပွင့်လွင့်ကြွေ ကျသွားသလိုဖြစ်သွားတာပေါ့ နော်။ အသက်တော့သိပ်မကြီးသေးဘူး၊ ၄၅ နှစ်ပဲရှိသေးတယ်။ ရခိုင့်ဂီတလောကအတွက်တော်တော့ကိုမျက် ရည်ကျ အားငယ်စရာတခုလိုဖြစ်သွားပါတယ်။ ရခိုင့်ဂီတမျိုးဆက်သစ်လူငယ်တွေကလည်း သူကွယ်လွန်သွား တဲ့အတွက်အရမ်းကို စိတ်ထိခိုက် ခံစားခဲ့ကြရပါတယ်“ ဟု ရခိုင်အနုပညာလူငယ်တဦးက ပြောသည်။ ယခုကွယ်လွန်ခဲ့သည့် ဦးရွှေကျော်ထွန်းမှာ သူ့၏ဘ၀တလျှောက်လုံး၌အိမ်ထောင်မပြုခဲ့ဘဲ လူပျိုကြီးအဖြစ်နှင့် နေထိုင်ခဲ့ပြီး သူချစ်မြတ်နိုးသော အနုပညာဖြင့် ရခိုင်ပြည်သူများကို တဖက်တလမ်းမှ တာဝန်ကျေပွန်စွာ ပေး ဆပ်ခဲ့သူ တဦးဖြစ်သည်။
သူသည် ရခိုင်ပြည်နယ် မြောက်ဦးမြို့ ကံလှရပ်ကွက်မှ ဖြစ်ပြီး အဖ ဦးမောင်ဝေနှင့် အမိ ဒေါ်မထွေးဖြူတို့၏ သားသမီးဆယ်ဦးအနက် ဒုတိယမြောက်သားဖြစ်ကြောင်း သိရသည်။
သူ့အလောင်းကို ဇန်န၀ါရီလ ၂၁ ရက်နေ့ နေ့လည် ၃ နာရီတွင် မြောက်ဥက္ကလာပရှိ ရေဝေး သုသာန်တွင် မီးသင်္ဂြိုလ် မည်ဖြစ်ကြောင်း သိရသည်။
(တေးရေးဆရာ ကိုရွှေကျော်ထွန်း ကွယ်လွန်သွားခြင်း (သို့မဟုတ်) အနုပညာ ပန်းတပွင့် ကြွေလွှင့်သွား ပါသဖြင့် သူ့၏ လုပ်ဖေါ်ကိုင်ဘက်များ အပါအ၀င် မိသားစုများနှင့် ထပ်တူ ကြေကွဲ ၀မ်းနည်းရပါကြောင်း ဖေါ်ပြအပ်ပါသည်။ နိရဉ္စရာ သတင်းဌာန)
...........
Ref: နိရဉ္စရာ သတင်းဌာန
0 comments:
Post a Comment
မှတ်ချက်တွေကို ဖော်ပြရန် ခဏလေးစောင့်ကြပါ။